本文重點
我哋早幾日先至寫過，中央同特區政府為咗減少今年七一嘅上街人數，一方面將大批原定喺今年上半年推出嘅爭議性政策同法案，推遲到七月後先出台，以免進一步激起民憤；另一方面又喺七一前加碼派糖營造和諧氣氛。除咗喺本周五成行嘅立法會訪粵團、盛傳喺下月推出嘅百億加碼紓困措施、以及煲呔曾事先張揚嘅全體議員訪川團，就連傳統上喺每年六、七月先簽署嘅CEPA協議，亦被迫要落藥催生，推前喺尋日早產出台，都唔知應該話佢哋工於心計、定係用心良苦好！
財政司司長鬍鬚曾同商務部副部長姜增偉尋日代表兩地簽署CEPA第六份補充協議。簽署儀式嘅風頭照舊又畀煲呔曾搶晒，佢愛將鬍鬚曾再次淪為活動布景板，一句對白都冇得講。不過今次儀式最特別嘅係，過往各份CEPA協議，都係安排喺每年六月底甚至七月底先簽署，零零舍舍係今年呢一份，就提早喺尋日簽訂，比過往足足早咗成個幾兩個月。
官方解釋 金融海嘯
官方解釋係今年香港面對金融海嘯衝擊，中央因此決定提早簽署CEPA六救港，但其實協議內嘅絕大部分措施，都要等到今年十月一日先正式落實，簽署儀式到底喺五月、六月定係七月舉行，實際上並冇任何分別。煲呔曾晨早預咗喺下個月大派百億公帑收買民心，將向阿爺訂落嘅大禮安排喺呢個月公布，分開兩個月慢慢搣，宣傳效果自然較佳。
睇番今次份協議嘅詳細內容，最受惠嘅係銀行及證券服務等高增值行業，真正惠及大部分市民尤其基層打工仔嘅，主要係容許內地台灣團過境香港一項，到底可以起到幾大嘅降溫作用，真係見仁見智。
其實一早已經有人警告，話香港唔可以單靠CEPA同個人遊，又指金融業始終係虛擬經濟，呢啲錢嚟得快亦走得快，香港經濟應該多元化發展同以實體經濟為基礎。可惜煲呔曾向來都急攻近利，又慣咗向阿爺伸手攞嘢挽救民望，邊會聽得入呢啲逆耳忠言。