卓妮尋日入咗沙田馬場湊熱鬧，聽到好多名人都話今日「無朋友」，要全心全意搞好個母親節，而過程一啲都唔簡單。好似啲名人老公，要一次過取悅老婆、外母、母親，搵節目可謂絞盡腦汁，特別係同老人家慶祝，淨係齊集兒孫出席已經係高難度動作，事關係錢解決唔到嘅，就等卓妮介紹吓啲名人點過母親節啦！
咁多名人之中，莎莎國際主席郭少明慶祝母親節最具特色，佢話會同太太及親戚朋友陪郭老太坐遊艇出海釣魚，晚上再設宴大事慶祝。原來郭老闆和郭老太都係釣魚發燒友，每個月出海釣魚兩至三次，遊艇背後設有釣魚船，設備齊全，釣得最多就係石九公同鱲魚呢類魚，即時煮嚟食，相當開心，同時亦可增加溝通機會，一舉兩得！
肥胡媽咪識食
身為潮州人嘅醫管局主席胡定旭一向好孝順，佢話會約齊啲兄弟姐妹一齊同年逾八十歲高齡嘅母親慶祝。點樣慶祝？肥胡識飲識食，就梗係帶阿媽去食好嘢啦，包起阿媽午餐和晚餐。不過，胡媽媽口味同肥胡一樣咁嘴饞，好似富豪飯堂「福臨門」桂花翅、「太平館」葡國雞、「富聲」及「富臨」嘅精美點心，要集合埋一齊，難度都好高吓！
莎姐四代同堂
太古（中國）主席陳南祿就預咗今日要陪老婆、外母及母親，諗住買個大蛋糕同佢哋慶祝，同埋Call齊啲孫出去食餐晚飯。早已榮升外婆嘅自由黨「莎姐」周梁淑怡就話，佢會同媽咪、大女智美和孻女智琪四位媽媽一齊歡度母親節。莎姐話，佢兩個女從小到大都好乖，所以都祝願兩個女嘅下一代同樣能夠孝順父母，就係最好嘅母親節禮物。
官場方面，保安局局長李少光一樣做「三陪」，陪老婆、外母和母親，一家人出街食飯，光哥仲祝願天下母親身體健康，真係有心！至於立法會議員甘乃威，同老婆、阿媽慶祝無煩惱，反而多個地區辦事處搞嘅母親節海鮮團令佢分身不暇。甘乃威話，佢阿媽八十歲高齡仍然頭腦靈活，經常到股票行打躉過日辰，投資保守專買大藍籌，所以遇着金融海嘯雖然無阿仔買雷曼蝕得咁甘，但都慘變中信苦主。
卓妮