上環有一條好出名嘅永樂街，由於海味舖林立，所以又叫海味街。永樂街之所以咁出名，係因為逢雨必浸，次次都會出現名貴海味水上飄嘅奇景，唔使等百年先至一遇，年年最少都有一鑊。好得意㗎，除咗見到鮑參翅肚漂呀漂之外，海味街一有水浸，條街又會自動改名，變咗滷味街，因為街坊街里開口埋口都係滷味。
今年嘅海味街終於有機會唔使改行賣滷味，渠務署大拿拿用咗二億元興建雨水抽水站，聽講話可以徹底解決海水倒灌嘅問題，頂得住五十年一遇嘅暴雨。不過，功夫茶始終仲有少少擔心，事關香港嘅天文現象好古怪㗎，年年都會整幾劑Ｎ年一遇嘅超級暴雨你歎，抽水站頂唔頂得住六十年一遇㗎？七十年一遇呢？八十年一遇又點睇？
講開倒灌，有一個古仔好搞笑，可以叫做傻瓜大禹治水，講出嚟大家未必會信。屯門位於掃管笏河旁邊嘅嘉和里村，又係香港其中一個逢雨必浸嘅地方，一年又一年周而復始嘅痛苦經驗話畀村民聽，落大雨水浸街嘅原因主要係渠道嘅排水能力好差，河水好容易由渠口倒灌，一倒灌咯喎，隨時水深及膝。村民等咗好多年嘞，渠務署終於派人去嘗試解決水患，點解決呢？渠務署傻更更走去加高河堤！
傻瓜大禹確係九唔搭八，人哋講緊河水倒灌，佢哋竟然加高河堤。打個譬喻，你條褲穿咗個窿，涼浸浸入風，唔通你豎高衫領就可以解決問題咩？咁荒謬嘅做法搞到村民更加恐懼，因為河堤高咗，等於雨水仲難排走，隨時由水深及膝變成水深及胸！
村民將呢件百年一遇嘅怪事話畀記者知，記者跟手向民政事務總署查詢，呢個政府部門都算唔話得嘞，即刻急急腳吹雞召集相關人等同村民開會。哈，更荒謬嘅事發生嘞，渠務署竟然話喎，佢哋淨係負責加高河堤，河水倒灌唔關佢哋事！
咦，咁就奇嘞，永樂街海水倒灌，渠務署負責處理，嘉和里村河水倒灌，點解又唔關佢哋事呢？哦，功夫茶明喇，海水唔同河水，渠務署係不屑對付河水嘅。
講咗咁耐，功夫茶其實最擔心係大嶼山嘅大澳。你知啦，舊年四川大地震之後，香港又有颱風黑格比來襲，大澳出現嚴重水浸，斷水斷糧又斷路，孤立無援嘅居民自稱「四川災民」。今年會係點？四川都重建嘞，大澳有冇改善呢？弊傢伙嘞，政府嘅防洪工程慢吞吞，水浸重災區永安街旁邊嘅河道築堤防止海水倒灌工程，要等到二○一一年先至有望完工。
功夫茶提提渠務署，大澳講嘅係海水倒灌，唔係河水倒灌，呢鋪冇得賴喇啩，傻瓜！