今屆立法會中，最無拘無束嘅聯盟都可算係專業會議，唔止投票時各有各投，連最近立法會聆訊雷曼事件嘅委員會開閉門會議，專業會議新丁鼠王芬都因為被身為主席嘅「自己人」何鍾泰指發言時離題，離場抗議。專業會議唔止新舊盟友鍾意公然鬥氣，已經做咗五年盟友嘅何鍾泰、石禮謙、劉秀成一樣唔多夾，尋日仲喺工務小組委員會公然火併。
話說工務小組就港珠澳香港口岸撥款作討論，建築界劉秀成話口岸大樓係重要地標，加上詳細設計嘅顧問費要成二億八千多萬，點都應該搞個建築設計比賽。點知身為小組主席嘅何鍾泰每聽到劉秀成講一次「使咁多錢」，就哦一次「唔係最多」，足足哦咗三次。劉秀成卒之忍唔住話：「石禮謙話對工程師嚟講唔係好多錢，我話對建築師係好多錢！」何鍾泰係工程師，劉秀成本身就係建築師，呢句話衝着邊個來，明眼人一睇就知道。
點知大舊石仲有嘢講，佢要求局方文件要寫埋啲細數，清清楚楚，仲大大聲話：「我哋唔係橡皮圖章！」何鍾泰忍唔住回敬一句：「啲文件好厚啦！」大舊石嬲嬲地立即「得」埋去：「唔係個個好似你咁叻，一睇就知唔貴！」三個人你一言、我一語喺度火併，搞到全場爆笑。