公民黨立法會議員陳淑莊男朋友叢鐵飛經營嘅京川食府「仙宮樓」，捲入涉嫌非法聘請外籍傭工案件，身為人哋女朋友嘅陳淑莊，尋日被問起時，竟然十問九唔知，真係唔知佢真懵定假傻。
男友間餐館捲入涉嫌請黑工案件，陳淑莊劃清界線，指事前完全唔知，直至有記者向佢查問，佢先至向男友大興問罪之師，據陳淑莊講，叢鐵飛曾經為案件去差館落過口供，並答應做控方證人，而非被告喎。
陳淑莊仲話，自己知嘅就係得咁多嘞，仲話自己都係大律師，知道事件進入法律程序，問多無謂，最緊要男友無事就得嘞咁話。
不過，大家仍然好唔明，叢鐵飛知道自己餐館捲入案件，佢咁近城隍廟，點會唔向做大律師嘅女朋友攞番個口頭意見呢？話晒情侶關係，就算唔係為咗打官司，平日傾閒偈時傾訴吓都會啩？