灣仔會展擴建工程完成後，尋日舉行首個大型活動，就係兩年一度嘅「HOFEX 2009」展覽會，展出與食品及餐飲有關嘅產品，於是請咗識飲識食識享受嘅旅發局主席田北俊同政務司司長出席主持開幕禮。田少到場推介靚紅酒之餘，仲幫港燈做生招牌即席下廚，幫手推銷港燈新出嘅環保節能商電廚具，協助本港餐飲業在經濟不景氣下，減低能源和營運成本。
當然港燈唔係要西裝骨骨嘅田少落廚搞到一頭煙啦，只係要田少作狀將蠔油倒入鑊中，而大廚就預早整定一個色香味俱全嘅「瑤柱菜圃」，加埋個蠔油汁就完成一味「遨遊維港樂逍遙」，寓意旅遊市道興旺，開正田少旅遊嗰瓣，港燈禮尚往來，認真識做！後來田少行到旅發局大本營嘅美酒佳餚年攤位時，雖然眼見各款紅酒試飲，但田少不為心動，唔通啲紅酒水準不及佢屋企嘅靚紅酒珍藏？