一場金融海嘯令唔少大機構損手爛腳，就算係大學，好多投資組合都蝕本收場。政府早前就撥款一百八十億元畀大學教育資助委員會成立研究基金，希望資助大學進行研究，一百八十億咁大筆錢，仲要話每年只用啲投資收益，其餘就繼續滾存，等啲錢愈滾愈多，點樣投資都好有學問，有咩閃失都唔知點算！
教資會主席查史美倫尋日就話，佢哋已經開咗幾次會，研究筆錢點用，佢仲問咗唔少金融界嘅朋友提供專業意見，今次實無死，當中包括一位嚟自金融界嘅行政會議新丁，另一位就係富聯國際行政總裁鄭維新。鄭氏一門三傑，鄭維新大哥鄭維健活躍於政商界，做過中大校董會主席及中央政策組首席顧問，鄭維新本身都唔弱，生意愈做愈好不特止，投資都好有心得。
有咁多猛人幫手，呢一百八十億應該會好見使，教資會最後就決定將其中一百五十億交畀金管局託管，其餘嗰三十億就再搵公司負責投資，咁就又穩陣又有一定回報啦！其實查太自己都喺商場打滾多年，以前又做過中證監副主席，實力毋庸置疑，又使咩搵人幫手呀，今次嚟個集思廣益，相信大家都會好放心。