本文重點
金融管理局總裁任志剛九月退休，早係財金界同政界嘅公開秘密，不過唔代表佢執掌金管局十六年嘅是非功過，可以就此一筆勾銷。社民連尋日就同佢算帳，喺立法會動議檢討金管局架構，矛頭直指任總。任總若然晚節不保，呢個打擊，絕不遜於股神畢菲特喺股海失威，所以今次赤膊上陣應戰，據聞佢罕有咁放低身段，親自打電話畀議員拉票，尋日又出動十幾名金管局「狗仔隊」駐守立法會數票，總算保得住無被人拆招牌。
炮轟金管局對人留情
任總未正式離任，已成為議員開刀對象。社民連陳偉業動議，要求全面改革金管局，泛民議員多年嚟嘅不滿，一次過輪流發洩晒出嚟，狠批金管局權力過大、黑箱作業；總裁薪酬失控、高到離譜，但係任期無時限，淪為個人私臠……總之可以鬧嘅都鬧晒，惟獨對任總反而手下留情，事有蹺蹊。
原來，雖然呢個議員議案不具法律效力，但據聞任總反應出奇地緊張，可能任總四個月後就退休，唔想臨尾香，留下污名啦，所以佢為咗呢個議案，今次唔止「任一招」，而係做出兩個創舉。
第一，親自出手拉票。據悉，當任總知道有議員動議，要做佢世界時，已經第一時間四圍搵議員傾偈摸底，到動議同修訂案嘅正式措辭出咗嚟，佢更加猛向議員落藥，游說否決動議。第二，尋日派出金管局職員做「狗仔隊」，進駐立法會各主要通道，防止議員「走票」。記憶中，過往涉及金融體系嘅動議，都係由財政司司長辦公室或者財經事務及庫務局派「狗仔隊」負責，金管局「放狗」，都係第一次，任總對議案嘅肉緊程度，可想而知。
白鴿黨公民袋掉轉槍頭
任總放低身段，向議員落藥游說，工夫果然無白費，平日對高官咬牙切齒嘅民主黨同公民黨，尋日突然變得好好相與，雖然炮轟金管局種種流弊，對任總就口下留情，話雷曼聆訊進行緊，呢個時候唔應該為任總嘅表現評分，公民黨仲讚任總喺九八年金融風暴一役一夜白髮，功不可沒添！然後，公民黨同民主黨仲炮口轉向對住由鬍鬚曾執掌、釐定金管局總裁薪酬嘅外匯基金諮詢委員會，批評透明度不足。
任總果然唔係省油嘅燈，公民黨同民主黨都畀佢搞掂，社民連見咁嘅場面，破口大鬧，指民主黨遊行時就叫任志剛落台，喺議會入面誓死護航，係精神分裂，政治道德操守有問題。不過，點鬧都無用，原議案同三個修訂案，全部喺極低票贊成下遭否決，任總晚節得保。