本文重點
紅十字會每年都會到立法會搞捐血日，但參加議員十隻手指數得晒，除咗小量唔適宜捐血外，其餘大部分議員都留守議事廳內辯論大噴口水，對於捐血救人就相當冷漠，可以講係捐口水多過血水。尋日又到一年一度嘅捐血日，結果只得六個議員捐血，同○三年沙士爆發一樣人數，比起去年就少咗三個議員，唔通班尊貴議員被豬流感嚇窒咗？
黃定光王國興抵讚
其實有份捐血嘅議員來來去去都係嗰幾個，換屆之後就剩番自由黨張宇人、工聯會王國興、「大象哥」黃定光等，佢哋捐血持之以恒，好值得表揚，所以有五次捐血紀錄嘅大象哥就獲紅十字會頒發嘉許狀。至於另一捐血常客王國興，已經忘記咗幾時捐第一次血，只記得當年胞弟做手術要大量輸血，令佢體會到捐血好有意義，自此捐血永無托手㬹。
卓妮睇完捐血後，就在議員休息室門口遇到「3L」林健鋒（Jeffrey）和梁君彥（Andrew），於是追問佢哋嘅灣仔新辦事處幾時正式開張。Andrew就話七月休會前，一定會擇個良辰吉日正式開張。咁邊個嚟擇吉日呢？就梗係「3L」嘅女將梁劉柔芬喇。
不過，Andrew爆料話，到開張嗰日，「3L」會變為「4L」，究竟加入邊個「Ｌ」，佢就唔肯講。鄉議局主席劉皇發尋日就話除咗平時喺立法會見面，私下已好耐冇同「3L」食飯喇，佢亦好享受依家嘅生活。Jeffrey就故弄玄虛話：「Sophie（梁劉柔芬）姓梁又姓劉，已經係兩個Ｌ啦！」Jeffrey果然係搞gag能手。
卓妮