咦，財雄勢大嘅特區政府都會問人借錢嘅咩？係呀，會(o架)，政府計劃發行債券吖嘛，亦即係攤大手板問市民借錢，假如你想做一做官老爺嘅債主，呢個係機會嘞。做咗債主之後，你可以幻想一下自己走去禮賓府噴漆寫大字「欠債還錢」，幾過癮(o架)。不過淨係幻想好咯喎，千祈唔好付諸實行，更加唔好學足大耳窿口脗恐嚇「殺你全家」，除非你博坐監。
政府做債仔，市民做債主，本來冇乜問題，世界各國都有發債嘅經驗，欠債最多嗰個叫做美國，如果擁有最大債權嘅中國要求佢一次過還債，全球經濟即刻玩完。之不過咁，香港發債發得特別騎呢，一來冇提供足夠資料，二來冇提供足夠時間。署理財經事務及庫務局局長梁鳳儀話喎，希望立法會喺五月二十日通過發債議案，然後五月二十九日刊憲。
嘩，姐姐，今日係五月五日，距離五月二十日只有十五日，你估議員係一目十行嘅超齡神童咩？邊夠時間睇晒所有文件呀？葉劉淑儀講得啱，時間表倉卒成咁，政府根本就當立法會係橡皮圖章，瞇埋眼照批可也。
時間太急固然唔妥，更加騎呢嘅係，政府為議員提供嘅資料竟然少之又少。石禮謙狠批時間唔夠之餘，更加翻一翻領匯上市嘅前科，所以佢話：「要攞我嘅票，唔該攞晒資料畀我睇！」又有道理喎，領匯上市之前講到天花龍鳳，結果上市之後搞到怨聲載道，一次又一次瘋狂加租，家陣諗番轉頭，原來全世界畀佢呃晒。
咦，話時話，可能最有先見之明嗰個係陳偉業，因為佢質疑政府趁現時低息環境之下發債，係另一個「金融騙局」。點騙法呢？具體情況暫時梗係冇人知啦，知就唔會受騙。問題係，雷曼兄弟迷你債券當初夠話穩穩陣陣啦，點知到頭來呃到大量苦主一鋪清袋。講真，香港人現時談「債」色變，政府點樣證明發債唔係騙局先？政府又點樣重建市民對債券嘅信心先？
哈，議員有時諗嘢都幾刁鑽，黃定光仲話，金融管理局總裁嘅薪酬係同投資收益掛鈎嘅，因此質疑政府發債係「開多個井畀佢飲水」。你都咪話黃議員太過陰謀論呀，金管局總裁任志剛年薪千萬，睇勻全世界未見過高得咁誇張嘅，連佢一班下屬嘅年薪都高過特首，唔開多個井又確係好難自圓其說啫，吓話？
點都好，功夫茶醒你四句忠告：迷你債券吸取教訓，政府發債切忌搵笨，議員把關必須審慎，市民小心勿做老襯！