立法會經濟發展事務委員會同環境事務委員會嘅訪粵團鐵定喺本月中成行，兩個委員會成員會喺今日舉行特別聯席會議，商討行程細節。立法會主席其實一早就同廣東省政府傾好晒訪問團行程，不過環境事務委員會主席余若薇就覺得同環保有關嘅景點太少，今日會提出參觀發電廠、食水設施等建議。
立法會秘書處估計此行連食宿，每位議員盛惠六千五百元，不過呢筆錢會喺議員名下為數五萬五千元嘅海外訪問帳目中扣除。睇番個行程，安排班議員要喺四日三夜去勻十個同物流、旅遊、環保有關景點，當中包括華南國際物流中心、深圳鹽田國際集箱中心、東部華僑城、南沙濕地公園等。
講開又講，原來其中一個景點「東部華僑城」係由當年掌管僑務及港澳事務嘅廖承志構想出嚟，廖承志過身後先由僑辦接手「築城」工作。經濟發展事務委員會主席林健鋒話，去東部華僑城主要係因為去完鹽田順路，冇其他特別原因，不過最近香港唔少政商界人士都有去東部華僑城玩，好似保安局局長李少光同廉政專員上個月就去咗華僑城旗下嘅雲海谷高球場打波兼度假，林健鋒都有份去，你話幾熱鬧呢！