政府班高官近日被豬流感（H1N1甲型流感）搞到一頭煙，難得政制及內地事務局局長林瑞麟（林D9）仲有閒情逸致去恤髮。卓妮上周四撞到林D9光顧灣仔富豪飯堂福臨門隔籬間平民髮廊剪髮，舖頭寫明夜晚八點半閂門，不過林D9就接近八點先去幫襯，結果髮型師要OT十五分鐘先收得工。
閉目養神唔出聲
林D9闖入平民髮廊理髮，一嚟到就揀咗坐舖頭正中位置，任由街坊欣賞佢嘅濕髮Look。林D9剪髮時好安靜，未有撩髮型師「八東八西」，只係叫對方係咁意修吓髮腳，然後閉目養神休息，鬼咁滋陰，難為髮型師為咗佢呢個貴客要超時加班工作，剪到夜晚八點四十五分至有得收工；不過有貴客幫襯，睇怕髮型師都唔介意開OT嘅。
林D9恤完髮，行步路都精神啲，卓妮上前捉住佢傾偈，問佢點解對呢間平民髮型屋情有獨鍾，林D9解釋話，幾個月前聽阿嫂介紹間髮廊，所以嚟試吓，結果一試就愛上髮型師Andrew嘅手勢。間髮型屋收費都幾平，唔指定師傅，洗剪吹都係盛惠七十八蚊；林D9就每次畀多少少錢指定搵Andrew為佢操刀，埋單計數，都只需百一蚊，認真係街坊價！
林D9話晒係高薪厚職嘅高官，剪髮居然咁平民化，真係慳家。卓妮追問佢早前喺屋企不慎滑倒整傷左手手腕，林D9急急腳走人，未有透露自己嘅康復情況，但卓妮所見，佢隻左手仍然有包紮，離開髮廊時亦要用右手拉門，避免用左手，睇嚟左手都仲未好番喎。
劉慧卿日本扭傷
無獨有偶，立法會議員劉慧卿都扭傷腳，尋日撐住支拐杖返立法會開會，但行起路來都尚算輕快。佢話早排去日本玩嗰陣，扭傷咗右腳腳面，本來諗住今日去睇醫生，但做做吓嘢又覺得冇乜嘢，可能連睇醫生都慳番！
卓妮