本文重點
新地太后郭鄺肖卿自從重掌主席一職後，三扒兩撥平定新地宮廷內鬥風波，親自示範一招「薑愈老愈辣」。年屆七十九歲嘅郭老太出晒名勤於政事，尋日五一長假期，佢精靈地現身集團旗下嘅荃灣廣場新面貌揭幕禮，佢戴上龍眼咁大粒嘅翡翠鑽飾及鑽石手錶，閃爆全場。
尋日個場合，新地副主席兼董事總經理郭炳聯都係主人家之一，但就唔見新地老大郭炳湘。卓妮所見，郭老太比炳聯仲要早到場打點，似乎對新地今次重錘豪掟二億八千萬銀翻新荃灣區商場好肉緊，即使同一時間新地喺銅鑼灣旗下商場有個向內地旅客派消費券活動，老太都度個優先期畀荃灣區，仲悉心打扮至出席。
避談炳湘近況
佢戴上一對由碧綠翡翠加上閃鑽鑲嵌而成嘅耳環，每隻足有一粒龍眼咁大，睇到班荃灣師奶嘩嘩聲，巨鑽戒指同耳環係同款設計，加上左腕上一隻金光閃閃嘅鑽石手錶，成身價值連城，難怪老太身邊嘅保鏢都排起人牆，阻止陌生人行近，相反新地三少嘅打扮就簡潔得多，但佢來去匆匆，未有回應記者提問就急急腳走人。
卓妮趁機捉住郭老太問吓大仔郭炳湘近況，佢聽罷不作回應，似乎唔想透露太多，講到嚟緊母親節會點樣慶祝，老太似乎都不願多談，只保持微笑，然後落力地左巡右巡，睇嚟喺郭老太嘅心目中，都係生意大過天。
卓妮