今日係五一勞動節，本來係應該開開心心放假嘅，可惜吖，全港打工仔滿腹牢騷，今日睇怕好多人會上街遊行，抗議政府保就業交白卷。勞工團體仲話呀，如果政府仍然唔推出實際措施保障工人權益，將會由五一直踩抗議到七一。
呢嗱嗱嗱，話口未完，又有三百六十人炒魷魚嘞。專營標籤印刷及追蹤服務嘅跨國大型印刷企業艾利丹尼森，由於收縮本港業務，所以決定大手裁員。唔計今次炒魷三百六，艾利丹尼森已經先後裁員六百人。
喂，話就話美國係全球經濟火車頭啫，特區政府都冇理由疊埋心水等運到吖，唔通美國一日唔復甦，香港就完全唔做嘢？更何況，政府其實係有足夠彈藥救人嘅，因為餐餐計錯數嘅財爺曾俊華再一次擺烏龍，佢以為舊年嘅綜合赤字係四十九億，點知最新數字顯示，原來係盈餘十四億先至啱，誤差高達六十三億。大拿拿六十三億，如果攞去發展基建開創就業機會，起碼建造業工人都有啖飯食吓吖。
咦，咪住先，功夫茶好似見到有部分打工仔陰陰嘴偷笑喎，邊個咁鬼馬呢？睇真啲，哦，原來呢班唔係普通打工仔，而係高人一等嘅超級打工仔，正式名稱係公務員。正當人人都擔心失業或者減薪，作為全港最大公務員工會嘅華員會建議，公務員今年凍結薪酬調整。所謂凍薪，即係維持原有嘅高薪。嘩！筍成咁，一不怕失業，二不怕減薪，唔怪得佢哋偷笑啦！
凍薪呢家嘢，以前算係壞事，現時算係好事。你睇吓外國政府吖，為咗表示共度時艱，好多官員主動減薪，譬如話新加坡，總理一減就減百分之十九，部長減百分之十八，普普通通中級官員都減百分之十二。香港？不但死都唔肯減，反而奉行「我唔加薪已經益咗你」嘅歪理。
講起就真係火滾，第一個帶頭唔肯減薪嗰個叫做曾俊華，呢條鬍鬚仔話喎，高官減薪作用不大。唉，啱㗎嘞，五一放假去遊行啦，抗議政府太無良啦，口號可以係咁：孤寒財爺做好心，香港人人望凍薪！
公務員凍薪而唔係減薪，梗係筍到不得了啦，其實講到尾，如果閣下有薪可減，已經算唔錯㗎嘞，大家睇睇接近二十萬嘅失業大軍，想利用減薪嚟保住飯碗都唔得。所以話啫，公務員有薪可凍，失業者無薪可減，可以話係今年五一勞動節最淒涼嘅悲歌！