工聯會早前爆冷選出新生代吳秋北擔任理事長，唔少人都擔心佢四十歲都未夠，夠唔夠經驗壓場，甚至幫佢起咗個花名叫做「唔揪得」。尋日佢喺工聯會五一勞動節酒會上初試啼聲，首次以理事長嘅身份向台下數百名嘉賓致詞，表現明顯有啲騰雞，多次讀錯講稿同食螺絲，聲線同中氣都唔多夠，發言內容亦冇佢上手黃國健（ＫＫ）咁辛辣同一針見血。
事後叫番ＫＫ評論吓佢繼任人嘅表現，ＫＫ就自爆話，當年自己第一次以理事長身份上台發言時，雖然冇乜讀錯嘢，其實對腳就由頭震到落尾，好彩咁啱有個演講台遮住，先至冇出洋相。佢又話吳秋北讀文學出身，演講讀稿絕對難唔到佢，尋日嘅表現亦算中規中矩。ＫＫ自嘲為吳秋北解畫，認真唔話得囉。
ＫＫ早前為留港投票支持預算案，錯過咗囝囝嘅澳洲畢業禮。尋日問阿仔原諒咗佢未？佢就請求大家唔好再寫佢呢單嘢，以免囝囝覺得佢擺個仔上枱喎。
喺酒會又撞到陳婉嫻，嫻姐唔做議員好逍遙，嚟緊會同家人去東歐旅行，仲會喺發現過豬流感個案嘅倫敦轉機，有朋友勸佢取消行程，但佢話今次歐遊計劃咗好耐，加上到佢真正出發時，可能豬流感已經擴散至全球各地，點避都避唔到，所以堅持如期成行，果然係一貫嘅嫻姐！