豬流感來勢洶洶，鄰近發病源頭墨西哥嘅美國，有好多個州已經被病毒攻陷，如果近排去過當地，都咪話唔驚。城市大學校長郭位四月初就返咗去工作過多年嘅德州休斯敦兩星期，德州已經確診有豬流感個案，郭校長近日先返香港，隨即就周身唔舒服，有晒流感徵狀，即時入浸會醫院住咗兩、三日接受治療。
除咗大病一輪之外，郭校長近排仲畀城大班導師嘅續約問題搞到一頭煙，早幾日已經喺報紙登廣告澄清事件，尋日仲專誠同傳媒解畫。郭校長一臉憔悴無神無氣，惟有揸住個咪嚟講嘢，不過，佢依然好識講笑，叫大家唔使擔心佢患上豬流感，因為佢喺醫院做咗好多檢查，醫生都話佢無事，唔會傳染人；仲話如果佢真係有豬流感嘅話，肯定係一個好早嘅個案喎；梗係喇，香港到依家都未證實有豬流感個案。
雖然郭校長已經好番好多，但仲有兩聲咳，喺呢個非常時期就應該戴番個口罩，既保障自己又保障其他人，否則點會有精力搞好城大呢？