豬流感隨時殺到，政府嚴陣以待，重推沙士時嘅全城清潔大行動，運輸及房屋局副局長邱誠武尋日下午三點單人匹馬落深水埗海麗邨做騷，睇吓屋邨加強清潔措施嘅實施情況，成邨人等邱副局長嚟，但邱副局長投入程度認真麻麻，一嚟到就頻頻傾電話，搞到向佢匯報嘅房署官員好無癮，究竟有咩大事件令佢分心呢？唔通係疫情有變？定係鄭汝樺局長下達重要指示？查實統統都唔係，事關我哋聽到佢提到「小巴、的士團體」，原來又係關交通事；咁又係，話明運輸及房屋局，運輸行先，房屋都係其次。
我哋於是向的士、小巴權益關注大聯盟主席黎銘洪打聽吓，原來佢早幾日打電話去約邱副局長五月初會面，反映吓佢哋關心嘅問題，包括開設跨境巴士到深圳機場後，對的士生意打擊好大等等，所以尋日嗰個唔係佢。
至於邊個好揀唔揀，揀咗邱副局長巡區嘅時候打電話去，搞到邱副局長做騷都唔夠投入，咁就要問過邱副局長至知喇！