前教育統籌局常秘羅范椒芬早前申請做東華三院總監，畀政府以可能有利益衝突為由變相否決咗，搞到羅太好唔高興，質疑政府因梁展文事件而過分收緊退休高官再就業嘅準則，並去信負責作最終審批嘅公務員事務局局長俞宗怡（Ｄ姐）要求解釋，令人覺得呢對昔日嘅同僚今日已經反目。
兩人尋日咁啱一同出席工聯會五一勞動節酒會，一碰頭就雞啄唔斷，密密斟唔知喺度傾啲乜，完全唔似有心病。散場時，兩人仲手拖手咁一齊離開，不知幾咁親切，十足好姊妹款；莫非真係一笑泯恩仇，將以前嘅嘢抹晒？問羅太會唔會同Ｄ姐傾番東華單嘢，佢就笑晒口咁話唔會，仲拉住Ｄ姐衫尾走，原來想黐對方車坐走人。
其實羅太嘅申請之所以被否決，並非全然係Ｄ姐嘅決定，事關Ｄ姐嘅下屬公務員事務局常秘黃灝玄同負責向Ｄ姐提供意見嘅離職公務員就業申請諮詢委員會，一早喺審批程序頭幾關已加咗種種限制，Ｄ姐只係參考佢哋嘅意見後做決定。不過羅太做唔到東華總監，都做咗東華與中大合辦嘅社區書院委員會委員，羅太話，今次係義務顧問，唔係受薪，所以唔使政府批喎。