立法會本周三開大會，議員驚現遲到早退集體放軟手腳嘅浪潮，尋朝續會又差啲因唔夠法定出席人數險些流會，浪費公帑。咁啱港大民意網站尋日公布民調，市民對立法會議員嘅評分都係下跌居多，時間夾都無咁準！
黃毓民跌得最勁
民調喺四月中進行，結果顯示，對比三個月前，市民最熟悉嘅十名立法會議員大部分都評分下跌，好似黃毓民、長毛梁國雄、陳偉業、李卓人、梁家傑同余若薇咁，其中以黃毓民嘅評分跌得最勁，下跌七點一分至三十五分，跟住係長毛，跌四點三分至三十二點二分，陳偉業亦跌四分至四十一點二分，調查機構分析，相信同議員粗口事件有關。
喺市民心目中，議員形象分急降，事必有因，議員自己唔爭氣，被人覺得履行公職練精學懶，肯定亦係原因之一，前日起一連兩日嘅立法會大會，就為議員嘅表現寫下註腳。
立法會上星期三大會表決預算案，搞到要通宵投票，議員捱咗一晚夜，休養咗一個星期，元氣都好似未復元，前日星期三開十一點大會，唔知係咪唔少議員起唔到身，一開波就出現出席議員唔夠法定人數三十人嘅尷尬場面，要議事堂響鐘響足三分鐘，先至湊夠人開到會。議員選舉時，個個向選民開期票，入到議會點樣盡忠職守，點樣勤懇服務市民，但連開會都遲到，點講得過去？
議員集體放軟手腳，開會遲到只係前菜，前晚大會去到尾聲，議員紛紛早退，有人甚至㩒咗掣，登記要發言，但到最後卻失蹤唔見人，立法會主席於是提早十分鐘，喺九點五十分宣布休會待續。
到尋日朝早續會，議員繼續無王管，當議事堂係無掩雞籠。當關注青少年吸毒問題議員議案舉手投票，社民連三子突然趕返議事堂，為免錯過投票表態嘅機會，陳偉業急急要求主席記名投票，當時在座議員都一臉錯愕，事關議事堂內得十幾個議員，明顯唔符合記名投票要有至少半數議席，即三十名議員出席嘅要求，但係有人講咗出口，議會就要硬住頭皮照做，於是惟有又響鐘叫議員歸位。
之不過，中午一點左右，係議員約人外出食飯嘅高峰期，時間逐分逐秒過去，個鐘響咗足足十三分鐘零十秒，距離宣布流會只剩下唔夠兩分鐘，議事堂內都只係得二十九個人，成班議員急如熱鍋上嘅螞蟻，不斷有人打電話急召黨友求救，最後公民黨湯家驊以蓮花步現身，呢班議會小學生先至僥倖避過一次流會鬧劇。
不過，避得初一，唔避得十五，議員如果以後唔的起心肝，準時開會、散會，流會出醜係遲早嘅事啫。