香港防癌會尋日開記招，宣傳五月廿三日喺富豪機場酒店舉行嘅慈善籌款晚宴，主席高永文同委員阿姐汪明荃都有現身主持大局，阿姐屆時仲會同葉振棠、陳潔靈、方伊琪等一班同輩歌手唱番啲懷舊金曲。豬流感席捲全球，政府已呼籲市民免得過都唔好涉足墨西哥、美國等疫症重災區，高醫生尋日聽到阿姐話今日會去美國登台，即時皺晒眉話：「嘩！你呢個時間仲要去疫區？」
做過醫管局專業事務及人力資源總監嘅高醫生，○三年沙士時係醫管局嘅抗疫要員之一，對應付重大疫症嘅預防措施十分熟悉。尋日阿姐見高醫生講得咁嚴重，即時顯得憂心忡忡，一時話擔心飛機「困獸鬥」細菌亂咁飛，一時又話唔敢同Fans握手，怕一個唔好彩中招。高醫生見阿姐咁擔心，拍心口幫佢準備定抗流感藥，等佢上機前啪幾粒「打底」，減低中招機會。
高醫生仲耳提面命，叫阿姐千萬唔好手多多四圍摸，而且要隨手帶消毒液傍身，一有空檔就要「洗手、洗手、洗手」！雖然高醫生已經將抗疫招數傾囊相授，但阿姐睇落都係唔放心，仲拜託高醫生為佢準備多幾份抗流感藥，等同行嘅家英哥同助手都可以有足夠嘅藥物傍身喎。
卓妮