本文重點
有「理大秋官」之稱嘅理大校長唐偉章，籌款果然有一手，繼上周六破格粉墨登場在紅館開騷彈電子結他表演籌款後，日前又搵到身兼理大校董會成員嘅「玩具大王」蔡志明捐出五百萬元，贊助舉辦國際學生創新挑戰賽，支持理大推動國際化，佢嘅愛女蔡加怡（Crystal）尋日就代父出席支票移交儀式，並以滿口流利英語致辭。
原來Crystal都係理大碩士畢業生，幾年前由美國波士頓大學畢業歸來後，為咗體驗本地大學生活，於是到理大工商管理研究院修讀企業金融學碩士課程，用一年半時間取得碩士學位。Crystal話，記得初初入學時，畀理大一式一樣嘅大樓搞到迷路，結果要好似去旅行咁拿住張地圖四圍去搵上課地方。
唐校長就話，非常感激蔡志明及Crystal嘅支持，否則比賽難以舉行。對於日後會否繼續向類似Crystal咁有潛質嘅舊生埋手？唐校長笑笑口話：「埋手？乜嘢意思呀！打劫呀？」他強調，捐錢與否要視乎畢業生對母校嘅關懷，仲要覺得項目好才會支持，所以佢會繼續與校友建立良好關係。
唐偉章享受籌款騷
講起上周六在紅館嘅演出，唐校長坦言，未出場前都有啲擔心，一來未試過，二來事前只係同幾位理大同學夾過兩個多小時，但結果上到舞台後個個都玩得好定，過程玩得好開心，而且又可以幫助理大完成重要任務，相得益彰。問佢下次會否開金口獻唱一曲？唐校長就話下次至算，仲好客氣邀請卓妮唱歌添！
卓妮