前政務司司長「肥龍」許仕仁嘅馬運都算係多波折，多年來養咁多匹馬，唔係匹匹都得心應手，當中只有已退役嘅「有聲有色」及最近開始出賽嘅「真財實料」有啲睇頭，以為三歲馬「真財實料」前途無限，有望打破「有聲有色」嘅彪炳戰績，但點知尋日晨操時突然失蹄，左前腳即時折斷，經檢查後決定當場人道毀滅，英年早逝，肥龍痛失良駒。
「真財實料」只出賽兩次，今年二月初次上陣已跑第三名，算係一鳴驚人，上月第二度上陣，不負眾望以大熱姿態勝出，令三年無親手拉過頭馬嘅肥龍喜出望外，仲笑騎騎拉埋前經濟發展及勞工局局長葉澍堃和前立法會秘書長馮載祥一齊去拉頭馬，相當熱鬧，兩次戰績更為肥龍帶來四十二萬八千多元累積獎金。
「真財實料」烙號一六八，相當好意頭，如果唔係經歷今次意外，早已排好喺五一勞動節出賽，跑嘅係千二米泥地，啱啱就係佢攞冠軍嘅距離，今次出事，肥龍連成本都搵唔番，仲要暫時退出馬主行列，唔心傷就假嘅！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |