商務及經濟發展局副局長蘇錦樑（Greg）上任以來風波不絕，佢上場之初被迫放棄加拿大護照，近期又爆出晒卡片風波，仕途上披荊斬棘。阿Greg尋日回母校北角協同中學演講時，自爆中四離開母校遠赴加拿大升學過程亦非一帆風順，當年移民加拿大後突然要用英語學習和溝通，即使英語底子再好，水平亦不及外國學生，所以頭幾年惡補英語比較辛苦，但為日後修讀法律打好基礎。
面對種種風波，阿Greg似乎有所體會，佢對學生話，當年自己同時下好多學生一樣，無深思熟慮想將來，而過程中或會遇到挫折，但佢強調人生並非永遠都係風平浪靜，堅持個人信念好緊要，並在事件中吸取教訓。
阿Greg回想當年母校生活，話自己係活躍分子，組樂隊打Band之餘，又參加話劇表演，全因為母校有股自由風氣，讓學生發揮所長，不忘感謝母校培育。協同中學一本七十年代嘅校刊，的確刊登咗一張阿Greg夾band嘅相，不過張黑白相嘅質素較差，好難有人認得邊個係阿Greg。