本文重點
城中多位「花甲名人」尋日無懼暴露年齡秘密，齊集電台搞咗個六十歲生日派對。名人對六十之年有不同解讀，前民政事務局常秘媽打李麗娟計劃六月喺香港擺大壽外，仲無懼豬流感，十月再飛去美國，搵齊班同年生日嘅幼稚園同學敍舊；同係六十歲嘅前天文台台長林超英就宣布轉型推廣「煲冬瓜」，佢笑言依家連天氣報告都懶得睇，要徹底忘記天文台喎。
黑英推廣煲冬瓜
呢班「花甲名人」個個駐顏有術，面上皺紋都唔多條，卓妮都要寫個服字。媽打更透露正秘密「回春」，目標係瘦身至一百零八磅，依家距離目標只有三磅，咁辛苦為乜？原來係想喺六月三十號擺大壽當日，着番十五年前上任做民政事務總署署長時訂造嘅六件旗袍。但媽打嫌未夠喉，十月再飛去溫哥華、多倫多、紐約同三藩市搞生日派對，佢話豬流感當道都照樣成行，最多戴多幾個口罩同密啲洗手。
媽打大事慶祝六十歲，退休冇耐嘅林超英就拒絕擺六十大壽，話唔到八十歲都唔會設壽宴。佢又以行動證明自己寶刀未老，話退休生活仲忙過返工，搞到每晚做夜貓，冇一、兩點都唔瞓，忙緊乜？全因身邊唔再有秘書，要自己接電話、回信同安排booking，周身唔得閒。不過佢愈忙愈開心，嚟緊更變身「煲冬瓜大使」，喺小學推動普通話教學。佢更自爆學咗普通話廿幾年，身兼香港普通話研習社旗下一間小學嘅校董，所以講得一口流利國語， 既然身懷絕技，唔排除喺電台開咪教「煲冬瓜」喎。
同場仲有今年都係六十歲嘅立法會飲食界代表張宇人，Tommy話內地發生疑似豬流感個案，令佢非常擔心，嚟緊將提醒業界隨時啟動沙士期間應用嘅多項衞生措施，包括設立火酒消毒機、為員工定時量體溫等，佢話港人今次防疫意識提高，唔怕豬流感會演變成另一場沙士。
卓妮