本文重點
金融管理局總裁任志剛九月卸任，幾成定局，只爭正式公布，不過，呢個日子將唔會係一、兩個月內嘅事。港府遲遲唔肯公布任總榮休，梗係唔係煲呔曾回心轉意啦，佢要逼走任總，安插嫡系「攞命陳」陳德霖，呢份決心矢志不渝，相信任總已無回天之術，官場流傳嘅解讀版本，係煲呔曾患上七一恐懼症，連公布任總榮休，都被視作政治炸彈，驚激發市民上街。所以，任總卸任消息，好有可能留待七一遊行後發落。
今年係內地政治敏感年，特區政府為免為阿爺添煩添亂，一切步步為營，多一事不如少一事，成個政府嘅施政步伐，都被七一遊行牽住鼻子走，所有可能激發市民上街嘅議題，可以唔出台嘅，都盡量唔出台，咁樣嘅政府，就算唔係有神經過敏症，都係患上短暫性肌肉痙攣，失去正常活動能力，據聞，環境局局長邱騰華連同運輸業傾停車熄匙，都打算留喺秋天至做，其中一個原因，就係避開七一，費事班的士大佬做咗七一遊行生力軍。
另一個例子，就係港府處理公布任總榮休消息嘅手法。煲呔曾部署兩年，安排心腹攞命陳入特首辦，無非想逼退任總，由攞命陳全面接管金管局，依家煲呔曾大計得逞，理論上應該急不及待公布任總卸任消息，但係到依家都毫無聲氣，真係有啲反高潮。特區官場流傳，港府遲遲未公布任總榮休，主要又係因為要遷就七一，港府評估，金融海嘯之下，社會希望任總留低坐鎮嘅聲音唔細，一旦喺呢個時候公布任總榮休，等如送彈藥畀泛民，又多個藉口，煽動市民上街，呢個罪狀，煲呔曾唔敢孭，於是港府亦唔敢博，惟有暫時「扣押」任總卸任消息。
驚任總玩嘢反擊
另外，官場亦有人指，其實港府愈遲公布任總九月退休嘅消息，對港府愈有利，事關金管局由任總一手湊大，金管局已儼如任總嘅獨立王國，透明度低，外人甚至港府都摸唔透裏面嘅操作，一旦任總喺呢個時候垂死反擊，港府隨時束手無策，依家港府遲遲唔宣布任總嘅具體卸任日期，就算任總真係玩嘢，港府都可以先發制人，宣布任總即刻離任，翦平風波，如果唔係，由得任總玩到九月，港府被玩死，都未到重陽。所以，按當前形勢，港府喺七月之前，睇嚟都唔會正式公布任總卸任。