本文重點
「男人最驚禿頭，有頭髮邊個想做瘌痢？」五十六歲的劉先生於廿年前開始脫髮，十多年間花近廿萬元買生髮水、幫襯坊間聲稱有助生髮的營養焗油，甚至到深圳植髮，但疑因診所衞生環境欠佳，導致細菌感染，毛囊水腫發炎。為了重拾男性自信，他回港找專科醫生執手尾後，再度植髮。
眼前的劉先生頭髮有點疏落，髮線有點向上移，算不上禿頭，是他在港成功植入二千條頭髮的成果。他表示，天生頭髮較稀薄，自小愛游泳但不常戴泳帽，頭髮長期接觸泳池氯氣後愈來愈稀疏。「試過用生薑磨頭皮、用生髮水，完全冇用！」他更試過花約兩萬元接受長達八個月的營養焗油療程，卻愈焗愈禿。
一年前他看廣告宣傳深圳植髮，比香港便宜幾十倍，便毅然一試，「價錢真係好平，唔使一萬蚊植一千九百束頭髮，但衞生設備真係差，一返到香港就毛囊水腫發炎，植一半甩一半，受過幾多痛苦先好番！」
整形外科專科醫生林竹筠解釋，劉先生屬男性賀爾蒙型脫髮，是男性Ｍ字額及髮線向上移的普遍成因，生薑磨頭皮、塗白蘭地、塗蛇酒等方法並無醫學根據，更可引致發炎，處理不當會留下疤痕，日後再植髮，效果亦會打折扣。
少女泰國誤植美人啄
林竹筠指，過去一年接獲三至四宗執手尾個案，皆因貪平到內地、泰國或台灣植髮，受細菌感染或對植髮髮型不滿。早前一名年輕女子，五官及身材都不俗，惟獨頭髮稀薄，毅然到泰國植髮，因溝通問題被誤植了一個美人啄，前額頭髮較前更稀疏，須回港消除美人啄。
林指出，現有藥物獲醫學研究證實可促進頭髮生長，但對輕微禿髮者有較明顯效用，嚴重地中海者即使植髮，頭髮亦未必回復濃密，禿髮者應病向淺中醫，勿胡亂使用坊間療法或藥物。