記者 李世華
「穿大窿」的細葉榕坐落於大埔元洲仔大王爺廟旁，穿心樹窿足足可容納兩個成年人。居於附近的何先生指，大樹雖早已被康文署以封鎖帶圍封，但因大樹毗連單車徑，擔心「個範圍封得咁小，一冧（樹）就死得人多」。
記者在現場所見，穿窿細葉榕高約廿米、樹幹直徑近三米，樹身明顯已朝單車徑方向嚴重傾斜，被侵蝕的樹窿高度與闊度均逾八呎。記者以樹枝輕撥樹身，即有大量樹皮及枯枝跌下。
專家直斥本末倒置
細葉榕所在土地於一九八六年由世界自然基金會香港分會向政府租用，並闢作自然環境保護研究中心，該會發言人黃小姐指出，該會無權決定大樹之處理方法，「我哋盡咗責任，已經即刻通知產業署，康文署就建議修剪樹冠，但就冇講過話要斬樹。」
港大地理學系講座教授詹志勇了解過大樹的情況後，認為大樹「病情」嚴重，「棵樹已經向前傾斜，中間個窿太犀利，依家只係靠後面嘅木質化氣根撐住，如果唔係我諗已經冧咗。」
至於康文署為大樹「減磅」的建議，詹更直指該署「斷錯症」：「冇錯係可以減輕負擔，但剪咗啲枝葉就唔能夠透過光合作用製造能量，令棵樹連自救嘅能力都冇埋，簡直係本末倒置。」詹認為若該樹沒有特別紀念或歷史價值，附近居民又不反對，當局應「考慮斬咗佢，費事砸親人」。
議員批評政策混亂
立法會議員陳克勤批評政府處理樹木問題混亂，即使政務司司長唐英年帶領的樹木管理專責小組正研究是否成立樹木專責辦公室，但成效備受質疑，「我最擔心係（專責辦公室）口噏噏，落手做就唔得！」
就「穿窿」細葉榕個案，陳克勤亦指，「就算康文署覺得棵樹有得救，都要加啲支撐頂一頂，如果唔係，冧落嚟又傷到人嗰陣又叫邊個負責？」
康文署發言人表示，有關大樹並非由該署負責保養，經評估後發現未有即時倒塌危機，但已建議減輕樹冠重量、平衡樹冠、移去面向單車徑的枯萎樹幹等。發言人認同，在沒有其他可行的改善方法而危及公眾安全的情況下，會選擇移除該樹。
官地冧樹奪命部門孭責
政府土地上的樹木一旦倒塌並傷及人命，到底法律責任誰屬？律師梁永鏗表示，倘已有專家判斷大樹有倒塌危機，當局又早已知悉情況，政府便需負上責任，「作為租客，世界自然基金會香港分會唔可以自己決定斬樹，而且已經做晒應該做嘅嘢，只係兩個部門決定唔斬，如果真係冧咗仲有人傷亡，就一定係告兩個部門，即係告香港政府！」