平等機會委員會嘅職責既然係反歧視同埋保人權，總舵主即使唔係超人，起碼都要係好人吖。好嘞，家陣呢個平機會主席鄧爾邦，亂花公帑大花筒，千夫所指人人鬧，冇可能算係好人，唔叫佢一聲衰人已經執到，係咪應該引咎辭職呢？審計署都已經發表報告炮轟嘞，詳細列出平機會所犯嘅七宗罪，爾邦哥哥依然賴死唔走，更加臉皮厚到否認自己大花筒，難怪平機會委員勞永樂講咗一句好正嘅評語，佢話呢條友仔係「草菅人權」！
平機會醜聞多多，鄧爾邦損公自肥，假如你係一個受到歧視嘅小市民，你會唔會去呢一個毫無公信力嘅公營機構求助吖？梗係唔會啦，學似病人互助組織聯盟主席張德喜話齋，如果遇到歧視，寧願向本報求助，都唔會向平機會投訴，因為傳媒比平機會更加認真處理問題。咁咪就係「草菅人權」囉，小市民嘅權利得唔到保障。
「東方報業民意調查」就審計署炮轟平機會事件訪問市民意見，結果顯示，對於平機會經常舉辦超豪研討會及訪問團，鄧爾邦更加租住接近三千蚊一晚嘅大使套房，四成受訪者認為係不必要開支，屬於浪費公帑；三成四認為係大花筒，不能接受；另有一成九認為開支應該用喺調查工作之上。
至於平機會未經政府批准就用公帑為鄧爾邦購買七百萬保額嘅人壽保險，四成九受訪者覺得係行政混亂，平機會已經變成無王管嘅獨立王國；三成四認為涉及個人利益，應該加強監管；一成四狠批既定程序形同虛設。
呢嗱嗱嗱，唔到鄧爾邦唔認大花筒㗎，民意清清楚楚說明一切。吖，功夫茶又諗起另一句名言，人在做，天在看，假如有人有本事同老天爺做個訪問，功夫茶相信，老天爺會咁樣講：阿邦仔呀，乖乖啦，認衰啦，如果再係咁無賴，個天都唔鍾意你！
由於平機會劣迹斑斑，民意調查又顯示，三成六受訪者認為鄧爾邦應該辭職問責；三成五要求佢公開交代事件；兩成五覺得平機會必須重組。
假如，鄧爾邦硬係屁股黐膠水，死都要黏住主席寶座，結果會係點呢？功夫茶認為，呢樣嘢先至係最大嘅浪費公帑，因為平機會等於自廢武功，冇人再有信心搵佢哋投訴，所有員工日日冇嘢做，唔係拍烏蠅，就係織冷衫，每年幾千萬經費變相倒咗落鹹水海。
唉，好心負責監管平機會嘅政制及內地事務局局長林瑞麟唔好咁廢啦，一於主動炒鄧爾邦魷魚！唔使驚喎，林公公，炒孕婦魷魚就話違反歧視條例啫，鄧爾邦又唔係女人，更加唔係大肚，炒失職麻甩係冇犯法㗎！