為咗增加收入，馬會建議最快下個馬季起增加五個賽馬日，博彩及獎券事務委員會早兩日舉行公開聽證會，大部分出席團體都表態支持，聽聞政府都傾向開綠燈，唔知一眾馬主又點睇呢。唔好以為馬主一定全力支持馬會呢個建議，本身係馬主嘅Tommy張宇人話要佢支持都得，不過有三大條件。
Tommy話，馬會首先要應承加場後唔會裁員減薪，馬會係大機構，如果唔裁員減薪可以有帶頭作用。其次就係希望每個月有最少兩日賽馬日喺星期六，同埋最遲要喺七月一日完成所有賽事，等一眾馬匹可以好好咁抖暑。Tommy話自己係愛馬之人，香港夏天又濕又熱，如果馬仔過咗六月仲要跑一定好辛苦，所以有咁嘅要求，希望馬會同佢一樣，錫住啲馬仔。
Tommy都可算係資深馬主，佢同太太名下有過八匹馬，最近嗰隻係「再戰群雄」，贏過八次冠軍同十次亞軍，不過自從上年十二月之後就再無出過賽。Tommy早前去咗澳洲墨爾本參加馬匹拍賣會，如果揀蟀成功，七月就有新馬登場。