尋日霧雨瀟瀟，立法會議員梁劉柔芬（蘇菲）卻興致勃勃組傳媒團遊志蓮淨苑南蓮園池，仲拉埋足總主席老公梁孔德撐場，蘇菲擔住把遮變身導遊，介紹園內一草一木，邊行邊借花木講佛偈寓人生，叫港人毋須因為金融海嘯愁眉不展，欣賞吓奇山怪石，一樣好happy。
蘇菲透露，十八年前開始喺志蓮做義工，閒來捲起衫袖喺園池幫手拔野草當修行，領會到人生只要衝破自己，唔好藉口多多，乜嘢困難都會迎刃而解。蘇菲看破紅塵不忘照顧吓芸芸眾生，月前發起成立社區導者學會，宣揚「開你的心」訊息，既喺電台開咪教大家開心過活，嚟緊五月尾又會搞全港攝影比賽，呼籲大家拍低身邊開心事物參賽，蘇菲周圍向人派「開心果」，莫非佢想變身做「Laughing姐」？
蘇菲學佛後雖然收晒火，但講開立法會班同僚，仍然有啲暗火，話說尋日一行人行去睇瓷雕展，睇見作者嘅鬼斧神工，蘇菲突然有感而發，話作者為求完美用三十年心血鑽研瓷雕，造詣已達精華境界，相比之下，唔少立法會議員提交建議時一味搵議員助理代筆，寫出來嘅建議根本冇精華，試問高官睇見呢啲垃圾建議又點會有心機喎！蘇菲炮轟議員寫垃圾建議，認真火藥味濃，到底佢所指何人，佢又冇講清楚喎。