徐立之貴為香港大學校長，原來小時候同唔少小朋友一樣，求知欲特別發達，鍾意「搞破壞」，屋企無嘢好玩，就拆開損壞嘅電器研究，雖然失敗連連，但佢就由細細個拆收音機、鬧鐘，到長大後愈拆愈細、愈拆愈勁，拆解人類基因、拆分子，終於做咗世界知名的權威遺傳學家！
中大生物系畢業、曾經係多倫多病童醫院研究所遺傳系主任及首席遺傳學家嘅徐立之，尋日出席香港青少年科技創新大賽，表揚一班明日之星，佢鼓勵大家不斷嘗試，佢話細個時一見到新玩意就坐唔定，鬧鐘、手錶等統統畀佢拆過，有時壞咗嘅電器畀佢修理後，「死期」延後一、兩日，佢就會好興奮，「唔使用得番，秒針郁吓就已經好開心！」但經佢手後「唔壞都整到壞」嘅都唔少，爸爸媽媽都畀佢激親。
徐立之仲話，科學研究跟發明係兩回事，發明可以「靠撞」，但科學研究就要清楚自然定律，必須有科學知識，發明先會事半功倍。佢勉勵一眾學生唔好只顧發明，忽略背後知識。佢仲提醒學生唔好功利主義，只為豐富履歷表而參賽。