豬流感火速喺美洲蔓延，連帶港人都聞豬色變。前馬會行政總裁黃至剛都好錫身，因為右腳半月板啱啱動完手術無耐，話晒有傷口在身，聽見有美洲豬流感肆虐，即時決定取消六月遊美國行程。
黃Sir尋日同太太現身沙田馬場，佢報喜話右腳傷口埋得靚，依家已經做緊腳部肌力訓練，唔使幾耐就可以跑番步。解除腳患困擾後，黃Sir本來諗住去美國加州間度假屋抖一抖，享受陽光與海灘，點知突然殺出一場豬流感，美國已經報稱有人中招，唔怕一萬最怕萬一，佢兩公婆都係決定避之則吉，留喺香港好過喎。黃太都唔敢鬆懈，話出街時會戴番個口罩添。
同場仲有醫院管理局主席胡定旭，佢兩匹愛駒「心路」及「八逢九紫」分別落場，肥胡一邊為豬流感事件開緊急會議，一邊抽時間入場打氣，鮮有露面嘅胡太都悉心打扮入場等拉頭馬，「心路」同「八逢九紫」最後喺不同場次跑出第二名，合共帶挈肥胡贏咗三十幾萬銀獎金，算係為肥胡沖沖喜。