本文重點
工聯會領導層換屆，揚言揮軍直選，要由以往抬轎嘅選舉轎夫角色，變坐轎入議會嘅大老爺。不過，直選唔易打，工聯求票若渴，唔止要先聲奪人，仲以行動示人，首炮要大搞五一遊行，其立法會代表葉偉明尋日事先張揚，經濟轉壞，今年保守估計可以發動到二千人上街，嘩，仲激過港府口中嘅反對派職工盟。特區官場成日講，港府根本無真正朋友，呢句話講得一啲都無錯！
港府同工聯會嘅愛恨關係，錯綜複雜，會長鄭耀棠係行政會議成員，但係上屆立法會嘅工聯福祿壽，即係陳婉嫻、鄺志堅同王國興，就係煲呔曾嘅三支頂心杉，對政府從不賣帳。所以，成日有特區高官同人呻到葉落，指工聯反政府，其實好多時仲激過泛民，港府施政有乜風吹草動，被人圍毆，第一個出拳嘅就係工聯。依家工聯矢言拓展直選戰場，所謂認票唔認人，港府睇怕都要變土瓜灣工人俱樂部裏面嘅大沙包囉。
輕輕作號召 六百人參加
港府官員成日吹水唔抹嘴，不過，投訴工聯會反對派角色激過職工盟，就有根有據，唔係空口講白話。工聯、勞聯年年搞五一勞動節遊行，今年適逢領導層換屆後嘅第一單大製作，尋日進行綵排，以「工聯會．為您，撐您」為口號，號召工友上街，輕輕召集，已經發動到六百人參加，比往年嘅三百幾人，多出一倍，充分展示直選動員能力。相反，睇吓另一邊廂嘅職工盟，尋日都係帶咗十幾人上政府總部，同工聯會拍埋，職工盟簡直變咗小兒科。
年中唔加碼 更多人上街
據聞已經向工聯高層明志，願意三年之後轉戰新界東嘅勞工界議員葉偉明，更加率先為直選熱身，鞭笞政府，不遺餘力，佢話，今年失業嚴重，幾日後嘅五一遊行，保守估計，會有二千人參加，五一遊行係向政府發出嘅最後通牒，如果年中政府無加碼保就業措施，好似增設失業援助金同擴大跨區交通津貼咁，社會怨氣肯定更大，總之，葉偉明講到，如果政府唔做嘢，工聯真係唔敢擔保，會有更多人上街啦。
嘩，呢類「鬥大」嘅語氣，以前只會出自泛民嘅口，估唔到依家喺工聯會都聽到，選票大過天。「工聯會．為您，撐您」未知真唔真，「工聯會．為票，揼佢（政府）」一定真。