中環出更：菩薩保佑智慧法師神速好番

尋日嘅浴佛儀式，行政會議成員劉皇發、前民政事務局局長何志平、前經濟發展及勞工局局長葉澍堃（Stephen）同埋昂坪360董事總經理張少華都齊齊出席，釋智慧方丈認真有面子。一向率直敢言嘅智慧法師自從上年八月突然中風後，好少公開露面，令卓妮好擔心法師嘅健康。尋日法師親自主持儀式，全程唔使用拐杖，之後仲接受傳媒訪問。智慧法師同卓妮講，個病嚟得好突然，起病嘅頭兩日都無人知，好在後來有徒弟發覺，先送佢入醫院治理。法師話當時嘅情況好危險，完全出唔到聲，行唔到路，更加不能見傳媒。

法師話醫生同佢講，以佢嘅病情，如果係普通人，最快都要五個月先講到嘢、一年先行到，佢康復得咁快完全係奇迹，依家佢每個月都要定時做檢查，睇四個醫生，平日就注意飲食，同埋每朝早喺寶蓮寺散步一個鐘。卓妮讚大師精神唔錯時，法師就笑住話，已經及唔上以前喇。

何志平尋日着嘅一套唐裝，與○三年時為香港求得下籤嗰套衫好相似。	劉皇發（前排右一）同葉澍堃（前排中）尋日好誠心地禮佛。 （陳德賢攝）	嵩山少林小武僧於素宴時為大家表演功夫，技驚四座，引來一眾賓客嘅掌聲。

肥平着黑色唐裝衫無包袱

卓妮尋日見法師已經行動自如、聽講都無問題，只係有少少無記性，不時要徒弟提醒，不過已經好難得啦。法師話自從入醫院後就不斷唸「大慈大悲觀世音菩薩」，多得菩薩保佑先康復得咁快。

何志平都好關心法師嘅健康，佢話喺做局長嘅日子認識法師，之後大家都有來往，佢好欣賞法師嘅眼光同幹勁，讚法師凝聚到大嶼山嘅動力。對於今次嘅素宴，何志平話食齋可以清腸胃，自己為身體好，不時都會食齋。

肥平尋日着嘅一套黑色唐裝衫，同佢喺○三年做局長時喺車公廟求籤時，為香港求得下籤嗰套衫好相似，顯示佢已經毫無包袱，對往事冇再介懷。

卓妮