咪住先，搞乜先？功夫茶因乜事幹含沙射龜先？講古仔之前，等功夫茶為大家提供少少基本生態常識。有魚有龜嘅地方，比較少蚊少蟲，因為魚同龜都係食蚊食蟲嘅；冇魚冇龜咯喎，蚊蟲大量孳生。
好嘞，講古仔。
香港出晒名係石屎森林，難得粉嶺有一個北區公園，可以畀市民呼吸一下相對新鮮嘅空氣。絕對新鮮嘅空氣就梗係唔使諗啦，鬼叫香港嘅保育政策失敗咩，為藍天打氣一事無成，卒之搞到澳洲政府要警告國民小心香港空氣。嚟到北區公園，行下坐下，睇下花草樹木，聽下雀仔唱歌，幾爽㗎。如果你有雅興，又可以去人工湖欣賞一下錦鯉，幻想自己係莊子，然後自問自答：「子非魚，安知魚之樂？」幾型㗎。睇完錦鯉，又可以睇下烏龜，讚嘆大自然嘅奇妙，竟然有動物能夠馱住自己一間「屋」四周圍躝街，幾正㗎。
正當大家陶醉喺一片詩情畫意之中，呢個古仔嘅反高潮出現嘞。負責管理全港公園嘅康文署，唔知係咪有烏龜踩親佢條尾，居然以方便清潔作為理由，一聲令下，將人工湖裏面所有動物趕走。趕走都唔止，康文署將總數一百隻烏龜送交漁農自然護理署，而漁護署又以冇人領養作為理由，一次過殺晒所有烏龜！
唉，大屠殺已經令人心寒，更加難頂嘅係，淪為一潭死水嘅人工湖冇晒魚同龜之後，即刻變身蚊蟲樂園。家陣死氣沉沉嘅北區公園，周圍都係蚊。
你知啦，蚊係惡名昭彰嘅帶菌者，一個唔覺意，又會傳染日本腦炎呀，登革熱呀，甚至係類似沙士嘅神秘病毒。
天氣開始熱嘞，尋日氣溫高達三十度，創咗今年新高。熱又點呀？蚊患愈嚟愈勁囉，咬人愈嚟愈兇囉，傷口愈嚟愈腫囉。唔好怪功夫茶烏鴉嘴，北區公園有可能係另一場瘟疫嘅發源地！
相對於壯烈犧牲嘅烏龜，幾十條錦鯉嘅命運好少少，送咗去中文大學崇基學院未圓湖。反正都係殘忍，點解唔順手殺魚呢？功夫茶諗到一個理由，禮賓府主人出晒名鍾意養錦鯉，康文署擦鞋仔唔敢輕舉妄動。
屠殺百隻烏龜嚴格嚟講其實都唔算係乜嘢大災難，功夫茶要講嘅係，見微知著，一葉知秋，從康文署嘅輕率態度可以反映一個好可怕嘅事實：香港嘅官僚作風麻木不仁到極，靠佢哋保育咯喎，死得！
空氣污染點解嚴重到嚇傻澳洲呀？麻木不仁囉。海水污染點解厲害到不適宜渡海泳呀？麻木不仁囉。大埔林村許願樹點解會折枝傷人呀？麻木不仁囉。赤柱點解會有病樹倒塌壓死女生呀？麻木不仁囉。
屠龜事件係香港保育政策嘅縮影，你話康文署係咪自相殘殺吖！