建制派立法會議員其中一個重要職能，就係當政府有議案要通過時坐定定喺度投票，政府亦都會預早同各議員打定招呼，請各位議員記緊返嚟投票，呢個做法一向行之有效，但尋日竟然喺個無咩爭議性嘅開位問題上甩轆，都算罕有。
話說尋日公務員資助機構員工事務委員會開會，其中一項議程係「保留策略發展委員會秘書處一個丙級政務官編外職位」，建制派竟然喺表決時以三比四投輸畀泛民，結果都幾出乎意料之外。其實政府唔係唔知泛民一向都不滿策發會，加上之前兩次為同一個位延期時，泛民兩次都反對，再講委員會委員仲係建制、泛民各佔一半，唔通政府事前偷懶、當建制派議員吓吓都識自動波？若然真係咁，今次就自食其果啦。
睇番尋日嘅表決結果，建制派嘅葉偉明、潘佩璆同葉劉淑儀都坐定定喺度投票，但都係得三票。李鳳英之前跌親，尋日嚟唔到開會就無辦法啦，但只要政府箍緊尋日缺席嘅譚耀宗呢票，就已經可以同泛民四比四打和啦。今次搞到甩轆，究竟係政府大安旨意、定係譚耀宗冇咗回事，咁就真係要問過當事人至知喇！