亞洲最大嘅香港家庭用品展尋日喺會展揭幕，今次搵嚟唔少第三世界國家參展，鎮展之寶就係一塊由伊朗製造、價值一百萬美元嘅波斯地氈，足足一層豪宅咁貴，連商務及經濟發展局局長劉吳惠蘭都忍唔住走去望多兩眼。
區區一塊地氈點解叫價咁貴？之唔係因為佢係伊朗傳統手織地氈，尺寸約係一張雙人床咁大，由專人設計，以伊朗建築物為圖案，再搵指定師傅一針一線縫製，織造過程全部用天然染料，用足三年時間合共七千小時製成，堪稱嘔心瀝血之作。據講編織過程有一位管工從旁監工，但連佢都唔掂得塊地氈，只有師傅先可以觸摸，真係夠晒矜貴。劉吳惠蘭尋日巡視展區時都話大開眼界，更喺地氈前留影。
塊價值連城嘅波斯地氈由尋日起至本月廿三日展出，市民都可以去睇多兩眼。大會話如果有人肯出得起錢，會割愛出售，可惜今年遇着金融海嘯，富豪身家都縮晒水，唔知有幾多有錢佬會願意買嚟墊吓腳呢？