前立法會會計界議員譚香文（Mandy）去年九月選舉落敗後沉寂多時，既退出公民黨核心，就連唯一嘅平機會委員公職，日前都畀政府搣走埋，唔再委任佢，兩袖清風嘅Mandy近日做回稅務顧問老本行，但佢笑言收入多過做議員，仲有時間日日跑步Keep Fit，生活勁Happy！
Mandy尋日出嚟講平機會啲衰嘢，見佢瘦咗又靚咗，以為佢匿埋秘密抽脂，原來係跑步有功至真。Mandy話，唔做議員後生活清閒咗好多，每朝喺屋企樓下跑步半粒鐘，日子有功踢走埋身上十幾磅肥肉，就連跟咗佢多年嘅雙下巴都消失得無影無蹤。
Mandy又晒幸福話唔打議員工一樣生活無憂，做回會計老本行後，因為遇啱金融海嘯下有唔少人需要債務重組，真係開正佢嗰瓣，生意多到唔停得手，計落依家每日只做一、兩粒鐘，收入就等於以前日做十幾粒鐘嘅議員生涯，難怪佢風騷地話，得閒返吓教會做見證，又搞咗個協助殘障人士申訴權益嘅「意外之友」會，行善積德，生活充實過以前好多喎。