聽日（周三）就係財政預算案表決日，究竟財政司司長曾俊華用陰招箍票能唔能夠奏效，依家仲係未知之數。好似本來話咗要去澳洲參加囝囝畢業禮嘅工聯會KK黃國健，分分鐘因為政府「吹雞」被迫要留港投票。不過尋晚工聯會新領導層見記者，KK就神神秘秘冇現身，行蹤成謎！
工聯會尋晚選舉新一屆領導人，身為行會成員嘅會長鄭耀棠成功連任，問到工聯會四名立法會議員聽日嘅投票意向，佢繼續賣關子，話依家仲未決定。咁KK去咗邊？棠哥話佢尋晚仲喺香港，但屋企有事請假，先至冇現身。咁聽日會否現身投票呢？棠哥又賣關子，只係話「相信會」，尋晚我哋嘗試過聯絡KK，可惜搵佢唔到，睇嚟唔到最後嗰刻都唔知結果，情況就好似鬍鬚曾為預算案拉票一樣。
講番工聯會嘅新領導層，本來係理事長熱門人選嘅林淑儀，最終只係做咗工聯會副會長，理事長就由現年三十九歲、被視為工聯會新一代接班人嘅吳秋北接任，吳秋北為香港文職及專業人員總會會長，○六年出任工聯會副理事長，進身工聯會領導層，在領導層中學歷最高，三年前已係博士研究生。本身係大熱門嘅民建聯黃定光太太嘅林淑儀話，對今次結果唔失望，相反仲好開心添，事關配合咗工聯會要年輕、專業化嘅路線！