本文重點
香港賽馬會建議最快下個馬季開始增加五個賽馬日，建議除咗要得到博彩及獎券事務委員會通過，仲要得到政府首肯。雖然港府內部評估過申請後都傾向開綠燈，但民政事務局嘅高官始終遲遲唔肯表態，次次淨係話有關建議仍在考慮中，當局會持開放態度小心聆聽各方意見，搞到馬會班高層鬼咁心急。
落足嘴頭 連消帶打
馬會天水圍電話投注中心第一期尋日開幕，除咗馬會主席陳祖澤（John）出席外，仲請埋政務司司長同勞工及福利局局長張建宗做主禮嘉賓。馬會估計中心可以創造二千五百個職位，今個星期六會喺天水圍舉行招聘會，提供一千五百個職位，包括為中心聘請一千個兼職電話投注事務助理以及五百個由一般職級到管理階層嘅職員，部分兼職職位仲會設即場面試。中心第二期工程會喺今年九月完成，不過剩低嗰千五個職位幾時先請人，阿John就暗示要睇吓政府肯唔肯增加本地賽事及轉播越洋賽事喇。
阿John尋日軟硬兼施，話如果每個馬季增加多五個賽馬日，馬會就可以提供多四千一百個職位。但問到如果爭取唔到增加賽馬日，天水圍電話投注中心原定嘅二千五百個職位會唔會減少時，佢就顯得好無奈咁話：「好難講喇！呢樣嘢（增加賽馬日）我哋梗係希望做到，無論情況如何，我哋都會盡量為香港創造同保住職位。」阿John雖然冇正面回應創造職位係咪作為爭取五日賽馬嘅籌碼，不過佢咁講法，變相公開同政府講數；佢仲落足嘴頭話，馬會收入增加會直接令社區受惠，希望市民支持有關申請，簡直就係連消帶打，卸減啲公眾壓力。
張建宗尋日出席完開幕禮後，即急急腳趕返政府總部公布最新嘅失業率上升至百分之五點二，身為主禮嘉賓之一嘅政務司司長都一齊走埋。阿John就瞄準呢個時機，公開同政府講數之餘，又爭取市民支持，起碼等啲主禮高官冇乜尷尬。阿John講數講得咁有技巧，馬會嘅申請要過政府呢關應該唔難呀！