恒指近期回勇，前排插到飛起嘅滙豐亦重返五十幾蚊嘅供股前水平，尋日收市報五十四點九五元，唔少低位吸納咗滙豐嘅股民見有三、四成利潤，近日紛紛沽貨獲利，啱啱做咗青年事務委員會主席嘅陳振彬（Bunny）啱啱賣出七萬股滙豐，獲利逾百萬元，但立法會議員陳健波就話滙豐唔再見一百元都唔沽貨，睇嚟滙豐長短線都有捧場客。
滙豐後市到底是升是跌，卓妮手中無水晶球，猜唔透，但股市最緊要係見好就收，Bunny深諳此道，上周五將喺三十七元左右買入嘅七萬股滙豐，喺五十五元嘅價位沽出，唔夠兩個月就袋走逾百二萬，另外留番七萬股壓袋，認真肥仔。其實滙豐唔係第一次帶挈佢贏錢，金融海嘯前佢喺一百一十八元嘅價位幫太太賣晒十萬股滙豐，淨袋九百幾萬，炒技令卓妮嘆為觀止！
陳茂波即放
Bunny賺錢不忘將肥水流畀別人，近日自掏腰包一千萬元，以亡母陳馬清香名義成立一個信託基金做善事，佢仲打算將愛駒「傳奇快車」贏馬嘅獎金，全數撥入基金行善，以前由佢揸旗嘅「健康快車」都會係受惠機構之一。
投資理念同Bunny相似嘅仲有立法會議員陳茂波（Paul）。阿Paul月前掃入幾萬股滙豐，平均價約四十元，近日分別喺四十九元至五十元之間沽出三萬股，賺咗十幾萬元。佢話股市呢排升得太急，擔心後市會有深度調整，加上手上仲有滙豐蟹貨，今次有錢賺，幾大袋咗先。
陳健波長揸
不過立法會議員陳健波就堅持揸長線，佢月前以四十七元掃入一萬股，供股後入貨平均價大約四十元，以尋日收市價計，帳面有十五萬元利潤，但佢話睇好滙豐一、兩年後會上番一百元，點都揸住唔放，筆錢佢打算將來供兩個仔讀書。全國人大常委范徐麗泰都係咁話，佢手上可謂揸重貨，但范太話滙豐係佢嘅養老金，除非等錢使，否則冇打算趁高求售。
卓妮