之不過咁，功夫茶想借問聲，既然係先知先覺，點解任總唔阻止銀行出售有誤導成分嘅雷曼兄弟迷你債券呢？點解要等到咁多人蝕到雞毛鴨血先至補鑊呢？最難明嘅係，喂，你話○六年已經警告金融衍生產品存在高風險，咁點解唔講清楚係迷你債券呀？空空泛泛嘅所謂警告，講咗等於冇講啫！
打個譬喻，泰國曼谷發生大規模反政府示威，軍方準備鎮壓嘞，子彈橫飛好危險，保安局發出旅遊警告，一定唔會咁講：各位親愛嘅香港市民，搭飛機出外旅遊存在高風險，有可能遇到危險，所以特區政府強烈呼籲，各位千祈唔好去存在高風險嘅地方；至於邊個地方存在高風險，就係嗰啲唔安全又好危險嘅地方。
即係咁，但凡發出旅遊警告，梗係清楚講明邊個地方危險㗎啦，今次就係曼谷嘞。即使當你任志剛真係發出過「投資警告」，之但係，居然乜鬼具體情況都唔提，呢種所謂先知，其實功夫茶都有貨賣，坐穩喇，聽住喇：投資市場有升有跌，部分股票存在高風險，隨時蝕到你一鋪清袋，強烈呼籲各位千祈唔好買！
任志剛嘅先知偉論，令人諗起坊間嘅神棍。風水大師嘅預測永遠係咁樣嘅：呢嗱，明年呢，出現天災嘅風險呢，好高，據老夫屈指一算呢，可以話呢，肯定係，地震！結果準唔準？神棍嘅預測百分百準確，因為地球年年都有好多地震。
當然啦，任志剛可以解釋，身為金管局總裁係唔可以針對個別金融產品作出評論嘅，否則就係粗暴干預市場。咁就帶出另一個問題嘞，唔應該評論啫，應該監管喎，如果金管局一早發覺迷你債券呢一類金融產品好有問題，因乜事幹唔叫停呀？因乜事幹任由目不識丁嘅公公婆婆畀人呃晒棺材本呀？任總嘅球技都幾叻仔㗎，佢大腳傳中，將個波交咗畀證監會。佢話喎，按現行機制，金管局冇權覆檢證監會已批准銷售嘅金融產品。
哦，明白晒，全知唔一定全能，先知原來好低能，任總都唔想見死不救㗎，無能為力咁解囉。
講到呢度，功夫茶又諗番起舊年嘅泰國，曼谷同樣係政局動盪，香港同樣係發出旅遊警告，之不過，特區政府遲遲唔派包機去救人。明知高風險，餐餐唔救人，呢個可以話係特區政府嘅施政作風。