做人最怕貨比貨，特區官場入面，林D9林瑞麟都算肯花心思搞噱頭，不過，尋日佢做東道主，開門接待喺台灣政治魅力直逼馬英九嘅台中市市長胡志強，論風采，林D9仍然被胡市長拋離九條街。
林D9身為政制及內地事務局，台灣事務歸佢管，無可避免要會一會胡志強，兩人尋日一見面，林D9就大動作握住胡市長雙手，稱胡係老朋友，胡志強食開政治呢行飯，即刻認林D9係老朋友，仲話大家關係似兄弟，電視新聞時間咁寶貴，梗係揀播得胡市長嗰句出街，林D9甫交手較勁就輸咗畀胡志強。
會後兩人見記者，林D9盡顯「人肉ＭＰ３」本色，無論記者問啲乜，都只係重複官方客套答案。做過台灣嘅外交官嘅胡市長好唔同嘞，全程展示寶島外交魅力，記者問台灣會唔會搞粵港台閩四地論壇，佢反過嚟讚記者好建議，又話自己無打算做國民黨主席，總之有問必答，揮灑自如。攞住英國牛津大學國際關係博士銜頭嘅佢，中途更加自動自覺用英文將講話提要再講多一次，咁就唔怕自己喺英文台失蹤啦。