黃宜弘老婆忽然做副局

港大民意網站定期就八個副局長嘅知名度做民意調查,尋日又有新數據,大家都想八卦吓呢班半隱形動物嘅認知度點低法,點知一睇電視新聞嘅畫面,即時飯都噴埋出嚟,中華總商會立法會代表黃宜弘老婆竟然榜上有名,IQ博士幾時開始夫妻檔從政?原來電視台馮京當馬涼,將呢位梁鳳儀,誤當成財經事務及庫務局副局長梁鳳儀,搵錯照片點錯相。

「黃太」梁鳳儀係小說家兼勤+緣嘅行政總裁,不時見報,去年至同老公慶祝夾埋一百三十歲大壽。呢位梁鳳儀一號六十歲,面圓曲髮,而上年由財金界轉型做副局嘅梁鳳儀二號,就面削直髮戴眼鏡,兩個人嘅外形差天共地,年齡都差咗一大截,電視台職員咁都搞得錯,除咗手民之誤,某程度亦都證明呢班副局嘅認知度真係麻麻,亟須改進。

據調查,梁鳳儀喺八個副局中市民認知度排第三,但認知比率都只係得嗰百分之零點八,排第一嘅教育局副局長陳維安亦只得百分之一點一,被人點錯相,都唔怪得人啦。