泰國局勢最近日日都變，唔少去咗當地旅遊嘅港人近日已陸續返港，包括同太太去咗清邁度假打波嘅自由黨副主席方剛。雖然佢全程連一名紅衫軍都未見過，但今次經歷亦令佢感觸良多，體會到政局穩定對經濟民生幾咁重要，又大讚香港啲反對派同示威者總體上都好和平理性。
方剛前晚由清邁坐飛機去曼谷機場，再直接轉機飛返香港，由於冇出過市面睇，因此冇直接遇到任何示威動亂，不過本身亦有喺曼谷開服裝店嘅佢，自然深知事件對當地經濟同民生有幾大影響，尤其係依家正值金融海嘯，今次動亂又撞正喺泰國新年兼復活節假嘅旅遊旺季舉行，對當地旅遊同零售業肯定係雪上加霜。
方剛慨嘆過去泰國亦曾多次爆發政變，但手法都尚算和平，唔似最近兩次搞到咁大鑊，佢以後都要諗清諗楚，先決定再會唔會去泰國玩。佢又指香港都成日有大型示威同政治爭拗，但最激烈都係掟吓蕉爆吓粗，從冇搞到要縱火開槍甚至封機場，希望香港可以永遠延續呢個傳統，大家一路爭拗一路做生意搵食。