王國興歐遊難忘牛屎味

工聯會立法會議員王國興本身屬牛,又係做牛奶製品業工會出身,連陪太太去歐遊,都不忘考察當地嘅雪糕及養牛業,真係服鬼咗佢。

喺剛結束嘅復活節假期,興哥同太太喺十日內去咗德國、奧地利、捷克同匈牙利四個國家,行程超趕,最特別係當中同牛有關嘅三個景點。第一站係遊覽德國慕尼黑參觀當地嘅養牛業,有濃烈牛屎味嘅草地令佢難忘,因為嗰度係用牛糞做肥料。第二站係造訪奧地利薩爾斯堡一間以牛做主題嘅商店,佢仲戴住牛仔帽同當地嘅著名品牌乳牛模型合照添。

梁家傑北京聽昆曲

第三係喺遊覽維也納嘅歷史名勝期間,見到當地嘅一架三輪雪糕車印住「冰琪凌」三隻中文字,間接證明內地旅客都好鍾意喺街邊買雪糕食。興哥遊覽捷克布拉格期間,碰啱美國總統奧巴馬訪問當地,佢都有嘗試逼埋人群堆同奧巴馬影相,不過就因為部相機太渣,連奧巴馬個人影都影唔到。

公民黨梁家傑亦喺今個假期陪太太去咗北京旅遊兼拍拖,造訪咗鳥巢、水立方、當地幾個著名嘅公園同文化藝術區等,最令佢印象深刻嘅係去咗皇家糧倉,聽昆曲《牡丹亭》。