本文重點
自從馬會放寬會員攜同未滿十八歲子女入場後，好多名人會員都帶仔女入場見識，確實令馬場增添不少活力，好似賭王何鴻燊與四太梁安琪嘅兒子何猷君、港交所主席夏佳理兒子Max，仲有行政會議成員、鄉議局主席劉皇發多個孫仔孫女，其中佢個仔劉業強兒子劉泰熹更係馬場嘅常客，出席率拍得住監場董事。
愛駒無晒影發叔無表情
前日復活節沙田賽馬，卓妮見到發叔一家大細入場湊熱鬧，皆因發叔愛駒「真龍船」與兒子劉業強有份嘅團體馬「好日子」同場較勁，劉泰熹當然都有入場，同時為兩匹馬打氣。卓妮見到九歲嘅泰熹在廂房看台欄杆揸住本馬簿，對住傳媒鏡頭即笑笑口舉起「Ｖ」字勝利手勢，對兩匹馬信心十足，甚有賭神風範。
泰熹在觀賞賽馬期間更有威勢，聲嘶力竭打氣，當見到爸爸隻「好日子」贏頭馬時，更戙起左腳握拳振臂歡呼，反而喺佢身旁嘅爺爺就無乜表情，因為其愛駒「真龍船」跑到無咗影。其後泰熹更陪爸爸落場拉頭馬，認真少爺威威。發叔話，孫仔孫女好鍾意馬，所以經常帶佢哋入馬場睇賽馬，而啱啱過咗嘅復活節假期，佢仲帶埋全家及孫兒到湛江旅行，打高爾夫球及歎盡地道美食，樂也融融。
卓妮