殺盡唔少賭場嘅立法會金融服務界議員詹培忠（金勞詹），復活節假又喺美國賭城贏過千萬，詹Sir個幾月前啱啱喺澳門賭場大殺三方，袋走五百幾萬，財來咁有方，睇怕佢都可以學澳門賭王何鴻燊講句「賭場日日印銀紙，冇法子窮囉」。
卓妮尋日中午喺立法會門外撞見金勞詹，佢晒命話同太太喺拉斯維加斯度假十幾日期間，玩百家樂贏咗八位數字，喺邊間賭場執到錢就唔講嘞，總之此行佢分別住過ＭＧＭ同金沙旗下酒店，大家不妨自己揣摩吓。
想出《勝經》傳授賭錢心得
詹Sir血拼賭城戰績一向唔曳，舊年聖誕期間就曾拉隊去搏殺，最初贏咗成千萬，可惜最後輸突，今次捲土重來執番過千萬，真係乜仇都報晒，金勞詹仲牙擦擦細訴賭史，話十幾歲就喺潮州鄉下賭「盲六」，玩法類似廿一點，賭仔生涯至今從未間斷，屈指一數賭齡長達近五十年，絕對稱得上係「賭仙」，所以佢話想出番本《賭聖勝經》，傳授吓賭錢心得喎。
詹Sir係咪真係咁掂就要問過佢至知，查實賭場有如鱷魚潭，十賭九輸，好似金勞詹咁好彩嘅睇怕都係異數，話口未完，詹Sir都忍唔住警惕吓啲賭仔，叫大家最好都係唔好賭，就算要賭就要學叻啲，唔好做「水魚」，更加唔好因為賭錢影響到自己心情同家人生活，一句講晒，即係小賭可以怡情，千祈咪瞓身賭身家。
卓妮