本文重點
雷曼迷債風波第一男主角金管局總裁任志剛尋日首次以證人身份，出席立法會雷曼小組委員會聆訊宣誓作供，引起政界、傳媒、市民及一眾雷曼苦主高度關注，但結果佢嘅供詞並冇乜石破天驚嘅新材料，反而佢喺聆訊結束後，連同數十名警員同場加演嘅一幕暴走中環先充滿戲劇性！
雷曼聆訊定喺尋日朝早十點開始，逾四百名苦主早喺八點幾已經雲集立法會門外，聲言要將一幅「千人血書」交畀任總。警方同立法會亦一早部署咗大批人手在場戒備。當任總架車一到，警員更加組成人牆，將任總座駕同立法會門口之間嘅通道重重包圍。在場苦主雖然情緒激動，但亦冇飛嘢掟嘢或者衝出示威區。最後任總亦好安全咁自行步入立法會，冇發生任何不愉快事件。
捨易取難改行公眾出口
任總作完供之後，大家仲以為佢經番停車場出口坐車離開，點知佢就捨易取難，改行一般公眾使用嘅立法會出口，再經過完全冇遮冇掩、係人都可以行過嘅皇后像廣場進入太子大廈，令在立法會門外守候嘅記者大為緊張，追到甩鞋甩屐。
唔通任總真係完全唔驚會畀苦主圍堵跪地請願，甚至威脅佢嘅人身安全？非也！原來警方一早已經喺佢嘅離開路線作出嚴密布防。單單由立法會門口到太子大廈入口，已最少先分段企咗十名軍裝同藍帽子警員，仲有四名便衣警員前後左右咁夾實任總同佢嘅兩名隨員一齊暴走。普通人估計行近啲望多眼都會畀差佬
，何況係雷曼苦主？唔怪得知任總可以行到大搖大擺、笑容滿面喇！
短短路程虛耗數十警力
任總一行人入到太子大廈，經一樓天橋進入歷山大廈，再經遮打大廈同中區行人天橋，直返位於國金二期嘅金管局總部，全程不但唔使落地，仲每隔幾十米就有兩至三名警員站崗。加加埋埋短短幾百米路程，估計已經虛耗咗三、四十名警員嘅警力，仲巴閉過領導人出巡。結果呢？全程一個苦主嘅人影都見唔到，好聽啲講就係虛驚一場，難聽啲就係自製恐慌、浪費警力！
我哋就有關安排問過金管局同警方，前者就話冇向警方提出過任何特別嘅保安要求，但亦冇解釋任總點解有車唔坐而選擇暴走中環，後者就更加完全唔肯評論事件。任總尋日嘅供詞咁行貨，斷估最少仲要作多兩三次供，如果佢同警方每次都玩到咁大，納稅人真係多得佢唔少。