瑪麗醫院原來有一項非一般「創舉」，由於醫生周身唔得閒，所以將部分工作「外判」畀護士。乜工作呢？就咁，如果你發覺大腸有問題，醫院通常會幫你照腸鏡，簡單咁講，即係將儀器塞入你後欄，透過微型鏡頭睇睇腸道有冇異常，護士幫醫生做嘅就係呢家嘢，正式名稱係乙結腸鏡檢查。
你可能會擔心，咦喂喂喂，護士始終唔係醫生，照腸鏡呢類有一定風險存在嘅檢查工作，冇理由搵護士越俎代庖啫，一個唔小心拮穿後欄，點算？冇錯嘞，你嘅擔心係正常嘅。瑪麗醫院曾經爆過一單醜聞，有一個「手機醫生」替病人照腸鏡切息肉期間，居然一心二用「煲電話粥」喎，結果涉嫌造成病人爆腸。呢個故事教訓世人，連醫生照腸鏡都有可能出事，何況係護士！
病人組織梗係唔認同呢個危險做法啦，護士組織又點睇？華員會護士分會主席蘇肖娟係咁講嘅，佢話如果有足夠訓練，唔擔心護士照腸鏡會有安全問題，不過，醫管局必須增聘人手。
蘇小姐都算客氣嘞，如果換轉係功夫茶，一定會老實不客氣直斥其非，唔該醫管局增聘人手啦，唔好再搵護士笨！
你又唔好以為醫生會贊成喎，曾任瑪麗醫院結直腸外科顧問醫生嘅外科專科醫生朱建華透露，公院醫生兼顧過多臨床以外嘅工作，欠缺足夠訓練，部分醫生「連支鏡都未摸熟」，將檢查工作轉交護士負責，等於剝奪醫生受訓機會。朱醫生又認為，假如檢查過程出問題，醫生會比護士有較佳嘅應變。
講到呢度，等功夫茶同大家歸納一下。首先，瑪麗醫院毫無疑問係搵病人笨，因為風險提高咗；其次，瑪麗醫院又係搵護士笨，因為無端端做多咗額外工作；最後，瑪麗醫院亦係搵醫生笨，因為剝奪咗受訓機會。一次過搵三笨，勁！
歸根究柢，最關鍵嘅問題係醫管局管理不善，導致人手不足或者資源錯配，七個蓋冚十個樽，護士咪要頂硬上做埋醫生嗰份囉。如果護士可以做醫生替工，負責登記嘅姑娘係咪又可以代替護士呢？掃地阿嬸代替姑娘應該冇所謂喇啩！
話時話，醫管局嘅管理亂七八糟，醫療失誤層出不窮，藥物事故屢見不鮮，功夫茶有少少懷疑，食衞局局長周一嶽嘅真正身份其實係一個替工。如果唔係未夠班嘅替工，因乜解究呢位仁兄嘅業餘表現係咁低低能能？上樑不正下樑歪，替工手下出愚公，於是乎，成個醫療系統就喺愚公管理之下變得烏厘單刀。
點都好啦，周局長有機會不妨照一照腸鏡，聽講大腸如果有問題，會妨礙工作表現㗎！